(旦)恶见一个(个)三爹共人磨镜。你许白贼话共人说,倒无人信。
(生)送我兄来到娘仔贵城,幸遇元宵,小人出街看灯。
无端灯下见娘仔。
(旦)你夭出街看灯,好乐然,你见我不年?
(生)小人亲见娘仔。
(旦)不爱人白贼。
(生)小人见娘仔花容玉貌,一见失了精神。
(旦)好井话。
(生)送我哥嫂到任,冤家冥日着你割吊。就返来,便是六月。
(旦)你许白贼话轻声说,人了听见。
(生)一日骑马上街市。
(旦)你夭骑马?
(生)娘仔你都不见。
(旦)你那卜有马通骑,也是租来的(个)。
(生)娘仔,你可记得楼上食荔枝时?
(旦)我六月常在楼上食荔枝。
(生)娘仔你做出一件事,可记得袂?
(旦)阮记都无乜事。
(生)夭共益春。
(旦)阮连益春都袂记得除。
(生)既是袂记得,待小人共你说。
(旦)你记得便说。
(生)你掞落荔枝,乞阮为记。
(旦)掞着你不?
(生)现掞着小人,夭箭!
(旦)不爱人白贼。
(生)我估(怙)你有真心,即来做恁厝奴婢。
(旦)陈三,你创景,生入人告罪。
(生)阮都不创景入别人。
你既然那卜亏心荔枝,我现收在只。
只荔枝是娘仔你的(个)不?
(旦)只荔枝果必会相见。
六月,六月值处人无荔枝?
(生)娘仔你无行止说话。
(拾介)不是,还小人。
(旦)秋哑,爱抢,抢去不好?
未知只物是不是?
(生)(拾介)娘仔声声句句说不是,看伊做(佐)乜?(拾)
(旦)荔枝便借人看,向希罕,抢去乜事?
(生)既(见)不是,看伊乜事?
(旦)今是了,各借阮看一下。
(生)在只手袖内,爱看伸手来提去看。
(旦)我苦,未是药。
(生)未是药便莫看。
(旦)前日有一人骑马游街市。
(生)娘仔可认得袂?
(旦)我袂认得。
(生)娘仔好目头高。
(旦)是我错手掞荔枝。
(生)好大错手,有采掞着小人,卜掞着阮简仔,也剥食了。
(旦)不是错手,井故意掞你?
(生)天,只荔枝不是娘仔亲手掞度阮,天就见责阮。
(旦)值人逆你?向苦咒誓。
(生)娘仔你弃人。
(旦)过去事志,谁人卜记?
(生)娘仔你不记,小人惓惓记在心头。
(旦)既然那卜是你,马今在值(值在)?
(生)是我,是我有马袂做得主。
(旦)因乜有马袂做得主?
(生)送乞,送乞磨镜师父。
(旦)马不骑,送乞磨镜师父乜事?
(生)学伊手艺来见你。
(旦)你向苦见卜阮做乜?
(生)只望卜共娘仔你结成夫妇。
(旦)结你骨头夫妇。
(生)着你辱骂,不敢应一半句。
(旦拖介生白)跋(拔)着小人,都未见好。
(旦)跋(拔)你骨头不碎。
(生拖旦介)跋(拔)着我,你着死。
(生)叫未成。
(旦)食大丈夫汉,厝不扫,假虔啼。
(生)今天甲我扫厝?
(旦)不井让你,只时无闲饭通乞人食。
(生)娘仔既有尊命,敢不扫。
(旦)紧扫,不爱人延。
(生)就扫。
(旦)一扫帚按向举那怙应嘴(口)。
(生)井扫厝也有师父?
(旦接扫介)无师父,我扫你看,句可好看你。
(生)向说,我扫乞你看。
(旦)今免你扫。
(生)娘仔又无乞我扫。
(旦)扫了辛苦成病,无人通伏事你。
(生)感谢娘仔痛疼。你念着荔枝再莫犹豫。
(旦)陈三你莫弄胆,踏着我脚你着死。
(生)我那死,你也着死。
(旦)乞伊人障说,乜话通应伊?
(生)今问娘仔乞一开处。
(旦)泉州人识礼,乱乱唱喏。
(生牵介旦)陈三胆大,放手。
(生)今夭甘放?
(旦)不放我叫。
(旦)叫陈。
(生)娘仔你叫,小人就跪。
(生跪)(旦)恁起来,阮不叫。你丈夫人膝下有黄金,向跪阮姿娘人乜事?
(生)礼下于人,必有所求。
(旦)放手。
(生)今着叫一声三哥即放。
(旦)放,阮叫。
(生)你骗我。
(旦)三哥,今放。
(生)今着叫小人一声官人即放。
(旦)你只一人上心,不是叫你三哥,大且喜了,又卜甲人叫你做官人。
(生)紧叫官人。
(旦)害,陈三,人来。
(生走)(生)娘仔都那是骗小人。
姻缘断约卜值时,今问娘仔乞一古记。
(旦)三哥你也莫得见浅。
(生)君子之求,听人所愿。
(旦)我看你都那卜打硬。
(生)小人做乜敢打硬?
(介)问娘仔乞一金言。
(旦)我只处心惊脚手痹(庇)。
(生)娘仔向虚惊做乜?
(旦)哑妈得知,我★(左人右再)得死。
(生)娘仔那死,小人就同娘仔你死。
(旦)阮便是怨切身命死,恁死正为乜?
(生)我千乡万里来到只,望共娘仔结成夫妻,娘仔你那死,卜我命做乜?不如共娘仔同死。
(旦)★(左人右再)当得障般好嘴(口)。
(旦)三哥,阮出来久长了,恐阮哑妈寻我不见,阮卜入去。
(生)娘仔共小人断约一声,乞你入去。
(旦)待阮去即来。
(生)既障说,乞你过去。
(旦)不爱人假忠厚。
(生)娘仔共小人断约一声。
(旦)恁乞阮过去,阮启(踝)你一深启(踝)。
(生)娘仔,你那一处,小人唱你一喏。
(生拦)乜物向生,急死人!
(生)障变面,即是袂得过去。
(旦)阮不变面,恁行开,乞阮过,阮惜惜你。
(生)娘仔你带只处,我句惜惜你。
(旦)值人卜你惜,一人倒<到>不听人嘴(口)。
(生)你都不听阮呾。
(旦)听伊人障般言语,甲我★(左人右再)当得起?
三哥,阮一卜力亲情放乞恁是年。
那畏恁家后有亲,到许时误阮身无依倚。
(生)娘仔,你疑小人家后有亲,就共娘仔咒誓。
(旦)只誓恶咒。
(生)就诅(咀)。
(旦)你诅。
(生)天,必卿家后若有亲,
(旦)且慢,父也是亲,母也是亲,你咒誓着咒乞伊明白。
(生)必卿家后若有妻小,日后耽误娘仔,天你谴责必卿早死。
(旦)三哥请起,一人倒<到>爱咒誓。
(生)小人受尽娘仔你气。
【水车歌】
(旦)你障说我只心肝都痛,阮★(左人右再)甘负恁人情。你★(左人右再)晓得我心头思想。
(生白)娘仔你今想到了。
(旦)为君发业,心闷(无)惆怅。
(生)娘仔共阮断约一声。
(旦)呾不出嘴(口),八死不少。
(生)人情意好,畏乜八死?
(旦)人情初相识,终无怨恨心。
咱今相惜在只心内,何用卜断约?
(生)既不共小人断约,入去罢。
(旦)你莫挂意,阮有真心,力恁丈夫人心腹句袂着。
(生)我坚心为你失了千志,你想我是一辜恩负义?
(旦)君你言语句句卜记。共君断约。
(生)断约值时?
(旦)须等待今冥三更时。
(生)值人留门?
(旦)恁留门。
(生)娘仔不来是年?
(旦)三哥,再不负约。
若还不来,头上是天。
(生)若负小人年?
(旦)我亦咒誓你听。
若还负君,促命早先死。
(生)感谢娘仔真有人情。
(旦)阮明知恁假意学磨镜来阮厝行。
(生)娘仔卜知,夭骂阮做乜?
(旦)我骂你是瞒阮妈共爹。君你今障说,我只心肝越痛。
(生)林厝亲情今★(左人右再)样?
(旦)懊恨丁古林大,早死无命。
(生)娘仔★(左人右再)舍得骂伊?
(旦)每日催亲(推亲),我几(己)转为伊险送性命。
(余文)我劝你心把定,一世不负君人情,心神把定莫着惊。
(生)娘仔既(见)你真心,讨一件物见阮做表记。
(旦)三哥既爱表记,阮一时无物,权力只御罗手帕乞恁为记。
(生)娘仔,只个(个)可轻。
(旦)三哥你真个好笑,你不见古人说:物轻人意重。恁既爱重物,只桌哥来不好?
(生)既障说,当人不当物,小人就收去。娘仔,今冥大志不通相耽误。
(旦)三哥不必致疑。
(白)早力荔枝为定期,今将御罗为表记。
在天愿为比翼鸟,在地愿成连理枝。